Thursday, 22 November 2018

સિંગાપોરનો આટલો ઝડપી વિકાસ કેવી રીતે થયો?

સિંગાપોર એક એવો દેશ છે જેમનું ક્ષેત્રફળ દિલ્લી કરતાં પણ નાનું છે. આ દેશ જયારે આઝાદ થયો ત્યારે તેમની પાસે ભાગ્યે જ કોઈ વસ્તુ હશે, જેનાથી તેઓ દેશને ગરીબીથી બહાર લાવી શકે. આ દેશ પાસે ન હતી ખેતીલાયક જમીન કે ન હતા ખનીજ સંશાધન અને લોકો ઝુંપડીઓમાં વસવાટ કરતા હતા.

પરંતુ આજે સિંગાપોરનાં લોકોનું સરેરાશ વેતન વિશ્વમાં ત્રીજા ક્રમે સૌથી વધુ છે. કન્સલ્ટિંગ ફર્મ જૂનિપર રિસર્ચ અનુસાર મોબેલિટી, સ્વાસ્થ્ય, સુરક્ષા અને ઉત્પાદકતામાં પણ આ દેશ દુનિયાના અન્ય દેશો કરતાં સૌથી આગળ છે. માત્ર એટલું જ નહીં, 'ધી ઈકોનોમિસ્ટ'નાં રેન્કિંગમાં પણ સિંગાપોર છેલ્લા પાંચ વર્ષોમાં સૌથી મોંઘુ શહેર રહ્યું છે.


જાપાનના શાસન સમયે સિંગાપોરના લોકોએ તમામ પ્રકારનો ત્રાસ વેઠ્યો હતો. ચીની પરિવારની ત્રીજી પેઢીનાં એક પુત્ર લી કુઆન સિંગાપોરની અંગ્રેજી મિડીયમ ની સ્કૂલમાં અભ્યાસ કરતા હતા. તેમનો વ્યવહાર પણ અંગ્રેજો જેવો જ હતો. આથી લોકો તેમને હૈરી લી કહીને પણ બોલાવતા હતા.

૧૯૫૪માં લી કુઆને પીપલ્સ એક્શન પાર્ટીની સ્થાપના કરી અને ત્યારબાદ ૪૦ વર્ષ સુધી તેઓ આ પાર્ટીના મહાસચિવ રહ્યા. ૧૯૫૯ની ચુંટણીમાં પીએપીની બહુમતી મળી. આ રીતે સિંગાપોર સંપૂર્ણ રીતે અંગ્રેજોનાં રાજમાંથી નીકળીને સ્વશાસિત રાજ્ય બની ગયું. આ સિવાય ૧૯૬૩માં મલેશિયા સાથે તેમનું વિલીનીકરણ પણ કરવામાં આવ્યું પરંતુ આ ગઠબંધન લાંબા સમય સુધી ટકી શક્યું નહીં.

વર્ષો સુધી બ્રિટિશ રાજ, જાપાનનું શાસન અને મલેશિયાનાં અંકુશમાંથી આઝાદ થઈને સિંગાપોર એક સ્વતંત્ર રાષ્ટ્ર તરીકે આકાર લઈ રહ્યું હતું; પરંતુ આ દેશ પાસે કેવી કોઈ ચીજ નહોતી કે જે દેશનાં વિકાસમાં ઉપયોગી સાબિત થઈ શકે. મોટાભાગનાં લોકો ઝૂપડપટ્ટીમાં રહેવા મજબૂર હતા અને દેશની લગભગ અડધી જનસંખ્યા નિરક્ષર હતી.


આ દેશનાં પૂર્વ વડાપ્રધાન લી કુઆન માનતા હતા કે ઇઝરાયેલની જેમ સિંગાપોર પણ ઝડપથી વિકાસ કરીને અન્ય દેશોને પાછળ છોડશે અને મલ્ટીનેશનલ કંપનીઓને આકર્ષિત કરશે. આ દેશની સરકારે વસ્તી નિયંત્રણ માટે બે કરતાં વધુ બાળકોને જન્મ આપતા લોકો પર કર લગાવવાનું શરુ કરી દીધું અને એટલું જ નહી, ભ્રષ્ટાચાર સામે પણ કડક કાયદા બનાવ્યા. આ સિવાય રસ્તા અને હાઈવે બનાવવા પર ભાર મુકાયો જેથી ઈન્ફ્રાસ્ટ્રક્ચરનો વિકાસ કરી શકાય.

સિંગાપોરની સ્થિતિ સુધરે એ બદલ તેમની ભૌગોલિક સ્થિતિનું પણ યોગદાન છે. આ દેશ એવી જગ્યાએ આવેલ છે, જ્યાં વિશ્વનો ૪૦ ટકા સમુદ્રી વેપાર સંકળાયેલો છે. પરિણામે આ દેશની સારી કમાણી થાય છે.

લી કુઆન સરકારે શરૂથી જ સિંગાપોરમાં રહેતી મિશ્ર વસ્તીને શિક્ષિત કરી અને માનવ સંશાધન પાછળ પણ નાણા ખર્ચ્યા હતા. હાલમાં સિંગાપોરની દુનિયાનો આર્થિક અડ્ડો ગણવામાં આવે છે કારણ કે સિંગાપોરની બેંક વિશ્વ સ્તરે સેવાઓ આપવા સક્ષમ છે.

No comments:

Post a Comment