એફિલ ટાવર

વિશ્વમાં આજે આકાશને આંબી જતા અનેક બાંધકામો થયા; પરંતુ એફિલ ટાવરની વાત જ કંઈક અલગ છે. આ ટાવરની મહામુલી ભેટ આપનાર ગુસ્તાવ એફિલનો તો ભૂલાય જ કેમ?

પેરિસના રહેવાસીઓ લંડનને બદલે પોતાના શહેરને પૂરા વિશ્વમાં મોખરે સ્થાન પ્રાપ્ત થાય તે માટે તેઓ વિશ્વ મેળાનું આયોજન કર્યું. જેમાં લોકોને આકર્ષિત કરવા નવીન પ્રકારનું બાંધકામ કરવાનું નક્કી કર્યું; જે ૨૦ વર્ષ બાદ નાબૂદ કરવાનું હતું. 

આ માટે ફ્રાંસના બાહોશ ગણાતાં એન્જિનીયર ગુસ્તાવ એફિલને આ કામ સોપવામાં આવ્યું. તેમની ડીઝાઈન સરકારને પસંદ આવતા તેઓ તરત જ બાંધકામ માટે ભંડોળ આપી દીધું. ૪૦ ઈજનેરો અને ૨૫૦ જેટલા કારીગરોથી ૧૮૮૭માં આ કામ શરૂ થઈ ગયું. ૧૪ મહિનાના સખત પરિશ્રમમાં તો માત્ર ૪ પાયા જ તૈયાર થઈ શક્યા. આખરે ૨ વર્ષ, ૨ માસ અને ૨ દિવસ બાદ એટલે કે ૧૮૮૯માં આ મિનારાનું બાંધકામ પૂર્ણ થયું.

મે, ૧૮૮૯માં ૨૧ તોપોની સલામી સાથે આ ટાવરનું ઉદ્ઘાટન કરવામાં આવ્યું અને ટોચ પર ફ્રાંસનો રાષ્ટ્રધ્વજ લહેરાવવામાં આવ્યો. ગુસ્તાવની લગન અને મહેનત જોઈને સરકારે આ ટાવરનું નામ એફિલ ટાવર રાખ્યું.

શરૂઆતનાં ૮ જ માસમાં અહીં ૨૦ લાખ જેટલાં લોકો આ ટાવરની મુલાકાત લીધી અને ટાવરને જોવાની ટીકીટોનું જ એટલું બધું વેચાણ થયું કે જોતજોતામાં બાંધકામનો ખર્ચ વસુલ થઈ ગયો. દર વર્ષે લાખો પ્રવાસીઓ માત્ર પેરીસની મુલાકાત આ ટાવર જોવા કરે છે. આથી સરકારે ૨૦ વર્ષ બાદ તેમને તોડી નાખવાનો પ્લાન કેન્સલ કર્યો.

આજે દરરોજ સરેરાશ ૨૦,૦૦૦ જેટલા લોકો આ ટાવરની મુલાકાત લે છે. આ ટાવરના સંચાલન અને સારસંભાળ માટે જ ૪૦૦થી વધુ કર્મચારીઓ છે; જેમાંના ઘણા ખરા તો ટાવર નીચે જમા થતા કચરાને વીણવાનું કામ કરે છે.

દર ૭ વર્ષે આ ટાવરને ફરી રંગવામાં આવે છે અને આ કામ બીજા દોઢ વર્ષે પૂર્ણ થાય છે.