Tuesday, 18 September 2018

ચાલતો આંબો, મળેલ છે હેરિટેજ વૃક્ષમાં સ્થાન.

આપણા ગુજરાત રાજ્યનાં છેવાડે આવેલ વલસાડ જિલ્લો વાડીઓના પ્રદેશ તરીકે ઓળખાય છે; પરંતુ શું તમે જાણો છો કે દેશ-વિદેશમાં વલસાડ કેરી તરીકે પણ જાણીતું છે. 


આ સિવાય અહીંનાં સંજાણમાં આવેલું એક આંબાનું ઝાડ અનેક અજાયબીઓ અને વિવિધતાઓ ધરાવે છે. સામાન્ય રીતે તમામ ઝાડ જમીનથી આકાશ તરફ વધે છે; પરંતુ અહીં આવેલો આ આંબો જમીનને સમાંતર વધી રહ્યો છે; જેથી તે ચાલતાં આંબા તરીકે વિશ્વભરમાં પ્રખ્યાત છે. રાજ્ય સરકારે આ આંબાને હેરિટેજ વૃક્ષોની યાદીમાં પણ સમાવેશ કર્યો છે. આ આંબો 1300 પણ વધુ વર્ષ જૂનો છે.

સ્થાનિક જાણકારોનાં મત મુજબ આ આંબો જમીનને સમાંતર આડો વધે છે અને તેની શાખાઓ જમીનને સમાંતર વિકાસ પામે છે. આગળ જતા વિકાસ થતાં આપોઆપ ડાળીઓ જમીનમાં જાય છે અને ફરીથી જમીનમાં બહાર આવી એક નવા જ આંબાના વૃક્ષનું સ્વરૂપ લે છે. જોકે પાછળનો ભાગ આપોઆપ સુકાઈને નષ્ટ પામે છે.

ભીલાડનાં ખેડૂત ભરત જાધવ અનુસાર આ ઝાડ પૂર્વ તરફ જ વધે છે. પૂર્વ તરફ આંબાની કોઇપણ ડાળી જમીનની અંદર જાય છે અને એની અંદર બરાબર સ્થિર થઈને મૂળ પકડે છે અને નવી ડાળી થયા બાદ પાછળનો ભાગ આપોઆપ સુકાઈ જાય છે.

અત્યાર સુધી આ આંબાનાં અનેક માલિકો બદલાઈ ગયા છે. આ આંબો જે રીતે વધી રહ્યો છે તે દાબ કલમની પદ્ધતિથી વધી રહ્યો છે. આ એક જાતની વંશ વર્ધનની પ્રક્રિયા છે; જેવી રીતે વડમાં થાય.