Thursday, 5 July 2018

ચાલો વિશ્વનાં પહેલાં મ્યુઝીયમને મુલાકાતે!!!


દીવ અને દમણ પર્યટકો માટે એક ઐતિહાસિક સ્થળ છે. આ ક્ષેત્ર રહસ્યમય સૌંદર્ય અને સમૃદ્ધ ઈતિહાસનો પરિચય કરાવે છે. અહીં આવેલાં મોટાભાગનાં સ્મારકો પોર્ટુગીઝ શાસનનાં સમયનાં છે. પર્યટકોને આકર્ષિત કરતાં આ ઐતિહાસિક સ્મારક અને ધરોહર આજે પણ જૂની દુનિયાની ખૂબસૂરતીને પ્રસ્તુત કરે છે.

દીવ અને દમણ ત્રણે બાજુએ સમુદ્રથી ઘેરાયેલ છે. સમુદ્રીતટો પર ચમકતી રેતીઓ સાથેનો પ્રાકૃતિક ઢોળાવ પર્યટકોને આમંત્રિત કરે છે એવો અહીં આભાસ થાય છે. વેકેશનમાં ફ્રેશ થવાં માટે આ એકદમ સારી જગ્યા છે. આ સાથે દરેક ઋતુ માટે દીવ અને દમણ યોગ્ય છે. શોપિંગ કર્યા વગર તો અહીંની યાત્રા અધુરી જ લાગે. હસ્તકળા અને કલાકૃતિઓની યાદો તમે તમારી સાથે લઈ જઈ શકો છો. મોટાભાગનાં શોપિંગ સેન્ટર શહેરની વચ્ચે જ આવેલાં છે. ભાવ ઓછો કરવાનાં શોખીન પર્યટકો અહીંની સ્થાનિક બજારોમાં જઈ શકે છે.


દીવ અને દમણનો ઈતિહાસ લગભગ ૨૦૦૦ વર્ષ જુનો છે. દીવનો ઉલ્લેખ તો મહાભારતમાં પણ જોવા મળે છે. ૧૪ વર્ષનાં વનવાસ દરમિયાન થોડા દિવસો પાંડવો અહીં રોકાયા હતાં. ભારતનાં ગુજરાત પાસે દેશનો સૌથી નાનો કેંદ્ર શાસિત પ્રદેશ ‘દીવ અને દમણ’ છે. ગંગેશ્વર મંદિર, સી-શેલ મ્યુઝિયમ અને ખુકરી મેમોરિયલ ખાસ અહીંનાં જોવાલાયક સ્થળો છે. સી-શેલ મ્યુઝિયમમાં તમે જાત-જાતનાં શંખ-છીપ જોવાનો આનંદ લઈ શકો છો. આ મ્યુઝિયમ વિશ્વનું એવું પહેલું મ્યુઝિયમ છે જ્યાં સમુદ્રમાં મળી આવતાં શંખ અને છીપલાંને મેગ્નીફાઇંગ ગ્લાસ નીચે રાખવામાં આવ્યાં હતાં.



અહીં આવેલાં ત્રણ બીચ – ‘નાગોઆ બીચ, ઘોઘલા બીચ અને જલંદર બીચ’ પર તમે પેરાસેલિંગ, સન બાથિંગ અને સ્વિમિંગનો આનંદ માણી શકો છો. અહીં આવેલું બોમ જીજસનું ચર્ચએ 17મી સદીમાં પોર્ટુગીઝ દ્વારા બનાવવામાં આવ્યું હતું. સીસમનાં લાકડાની કલાકૃતિઓથી સુસજ્જ આ ચર્ચ આજે પણ એક ઈફેક્ટિવ અનુભવ કરાવે છે. જો તમને રંગબેરંગી માછલીઓનું અદભૂત કલેક્શન નિહાળવું હોય તો તમે અહીં હાલમાં જ બનેલ હિલસા એક્વેરિયમમાં જઈ શકો છો. અહીં આવેલ જામ્પોર બીચ એક એવો શાંત સમુદ્ર તટ છે; જ્યાં તમે ઠંડીમાં પણ ખજૂરીનાં વૃક્ષોનો અવાજ સારી રીતે સાંભળી શકો છો. આ સાથે દીવનાં કિલ્લાનો પણ ભરપુર ફાયદો ઉઠાવવો જોઈએ.