Tuesday, 20 June 2017

આંતરરાષ્ટ્રીય યોગ દિવસ




આંતરરાષ્ટ્રીય યોગ દિવસ ૨૧ જુનના મનાવવામાં આવે છે. આ દિવસ એ વર્ષનો સૌથી લાંબો દિવસ હોય છે. અને યોગ પણ મનુષ્યને લાંબુ જીવન આપે છે. પહેલી વાર આ દિવસ ૨૧ જુન ૨૦૧૫ના મનાવવામાં આવ્યો. જેમની રજૂઆત ભારતના પ્રધાનમંત્રી નરેન્દ્ર મોદીએ ૨૭ સપ્ટેમ્બર ૨૦૧૪ના સંયુક્ત રાષ્ટ્ર મહાસભામાં પોતાનાં ભાષણ દ્વારા કરી જેમાં તેમણે કહ્યું,

યોગ એ પ્રાચીન ભારતીય પરંપરા દ્વારા મળેલી એક અમૂલ્ય ભેટ છે. જે મન અને શરીરની એકતાનું પ્રતિક છે, મનુષ્ય અને પ્રકૃતિ વરચેની સંવાદિતાનું સાધન છે, વિચાર, સંયમ અને પરિપૂર્ણતા પ્રદાન કરે છે તથા આરોગ્ય અને કલ્યાણનો સમગ્ર દૃષ્ટિકોણ છે. જે આપણી બદલતી જીવનશૈલીમાં ફેરફાર કરી નવી ચેતના જાગૃત કરીને તે આપણને આબોહવાનાં પરિવર્તનોનો સામનો કરવામાં મદદ કરે છે.

યોગ એ મૂળભૂત રીતે એક આદ્યાત્મિક શાખા છે. જે સુક્ષ્મ વિજ્ઞાન પર આધારિત છે. તેમનો મુખ્ય હેતુ મન અને શરીર વરચે સમન્વય લાવવાનો છે. જે સ્વસ્થ જીવન જીવવા માટેની એક કળા તથા વિજ્ઞાન છે. યોગ શબ્દ સંસ્કૃતની મૂળ ‘યુગ ધાતુ' માંથી મળે છે. જેનો અર્થ જોડવું, બાંધવું કે સંગઠિત કરવું એવો થાય છે.

આધુનિક વૈજ્ઞાનિકો મુજબ બ્રહ્માંડમાં રહેલી દરેક વસ્તુ એક જ આકાશ પરિમાણની અભિવ્યક્તિ છે. જે વ્યક્તિના અસ્તિત્વને એકાગ્રતાનો અનુભવ કરાવે છે, તે યોગી છે અને તેને જ યોગ કહેવાય છે જેને એકાગ્રતાની સ્થિતિ પ્રાપ્ત કરી લીધી છે.અને તે સ્થિતિને મુક્તિ, નિર્વાણ કે મોક્ષ પણ કહેવામાં આવે છે.


યોગ એ આંતરિક વિજ્ઞાન પણ છે. જેમાં એવી ઘણી વિભિન્ન પદ્ધતિઓનો સમાવેશ થાય છે. જેના દ્વારા મનુષ્ય મન અને શરીર વચ્ચે સંવાદિતતા મેળવીને આત્મા સાથે વાત-ચિત કરી શકે છે. યોગસાધનનું લક્ષ્ય બધા જ પ્રકારના કષ્ટો અને દુઃખો દૂર કરવાનો છે. જેના કારણે જીવનના દરેક સ્થળે સુખ, શાંતિ અને સ્વતંત્રતાનો અનુભવ પ્રાપ્ત કરી શકાય.


યોગની પરંપરાગત શાખાઓ ઘણી બધી છે જેમકે જ્ઞાનયોગ, ભક્તિયોગ કર્મયોગ, પતંજલિયોગ, કુંડલિનીયોગ, હઠયોગ, ધ્યાનયોગ, મંત્રયોગ, લયયોગ, રાજયોગ, જૈનયોગ તથા બૌદ્ધયોગ વગેરે. દરેક શાખાને તેના પોતાના અભિગમ તથા કાર્યપ્રણાલીઓ હોય છે, જે યોગના અંતિમ ઉદ્દેશ તથા હેતુ સુધી લઇ જાય છે.



No comments:

Post a Comment